Begnino Galego Castro será o candidato do PSdeG-PSOE á Alcaldía de Cerdido nas vindeiras eleccións municipais. Así o decidiron en Asamblea os militantes socialistas, que respaldaron a candidatura de Galego Castro por unanimidade. Será a segunda vez consecutiva que Benigno Galego, que exerce como funcionario do Ministerio de Defensa, encabece a lista do PSdeG-PSOE de Cerdido. De feito, nos pasados comicios locais e tras saír elixido concelleiro viuse obrigado a renunciar ao cargo a mediados de lexislatura ao ser trasladado temporalmente a San Fernando (Cádiz). Entón sustituino Cándido Prieto, actual secretario xeral da agrupación socialista.

O xa candidato do PSdeG-PSOE á Alcaldía de Cerdido destacou o traballo feito por toda a militancia e agradeceu o seu esforzo e a confianza que nel depositaron. Asemade, definiu como un dos principais obxectivos do partido medrar en votos para acadar en Cerdido un goberno progresista e de esquerdas que poña fin á ineficaz xestión dos populares ao fronte do Concello e posibilite sacar adiante proxectos prioritarios coma o desenrolo do polígono industrial. Unha das iniciativas que, na opinión de Benigno Galego, permitirá fixar poboación na localidade e frear a “alarmante” sangría poboacional que se vén producindo nos últimos decenios.

Nesta liña, Galego Castro subliñou que outra das prioridades dos socialistas será impulsar a participación cidadá e democratizar a institución municipal. Para concluír, apuntou que presentará unha lista onde se combinará xuventude e experiencia ademáis dun proxecto ilusionante para a cidadanía.

Saúdos; prensa PSdeG-PSOE